Ein Gwaith
Gwaith Craidd
Ein nod yw cynyddu a chefnogi datblygiad cymunedol, ieithyddol ac economaidd trwy gynnal amrywiaeth o weithgareddau a digwyddiadau sy'n targedu teuluoedd, plant a phobl ifanc a'r gymuned er mwyn annog pawb i gael y cyfle i ddefnyddio, ymarfer a chryfhau eu Cymraeg yn ardal Gorllewin Sir Gaerfyrddin. Trwy gynnig blas cychwynnol o'r iaith a diwylliant Cymraeg i lawer, rydym yn gobeithio annog nifer y siaradwyr Cymraeg a helpu i gyfrannu tuag at y targed o filiwn o siaradwyr Cymraeg erbyn 2050.
Gŵyl Canol Dre
Cynhaliwyd Gŵyl Canol Dre am y tro cyntaf yn 2018 ym Mharc Myrddin, Caerfyrddin, sef un o brif ddigwyddiadau Cymraeg ardal Caerfyrddin. Mae’r ŵyl yn ddiwrnod o hwyl ac adloniant i bobl o Sir Gâr a thu hwnt wrth gynnwys amrywiaeth o weithgareddau a digwyddiadau at ddant pawb, gan gynnwys perfformiadau o gerddoriaeth byw, chwaraeon, llenyddiaeth, celf ac amrywiaeth o weithdai. Mae yna dau lwyfan ar y maes, un yn cynnwys unigolion a bandiau adnabyddus o’r sîn roc Gymraeg yn perfformio ynghyd â pherfformiadau amrywiol gan ysgolion yr ardal. Mae’r ŵyl yn cynnig platfform i fusnesau gydag ardal stondinau i werthu nwyddau a chynnyrch ac i fudiadau lleol i hyrwyddo eu gwasanaethau.
Cynllun Profi
Nod Cynllun Profi yw gwella sgiliau pobl ifanc er mwyn eu paratoi ar gyfer byd gwaith. Trwy’r cynllun rydym yn darparu cymorth i bobl ifanc i ddod i adnabod eu sgiliau a chryfderau gan gynnwys cyngor ar gyfweliadau, adnabod sgiliau byd gwaith, darganfod cyfleoedd byd gwaith a chymorth CV ac ymgeisio am swyddi. Byddwn yn eu hannog i fanteisio ar gyfleoedd lleol gan gynnwys profiad gwaith, gwirfoddoli, prentisiaethau a swyddi.
Byddwn yn gwireddu hyn trwy fynd allan i ysgolion a cholegau addysg bellach er mwyn cyflwyno gwahanol agweddau o’r cynllun iddynt ar ffurf sgyrsiau a gweithdai ac yn eu hannog i gofrestru ar wefan www.profi.cymru
Mae’r wefan yn cynnwys cyngor bachog, digidol, apelgar a fydd o gymorth i gymryd y camau allweddol i fyd gwaith. Mae yna gyfres o bodlediadau a ffilmiau’n rhan o’r wefan er mwyn arddangos y cyfleoedd a’r sgiliau angenrheidiol ar gyfer sectorau amrywiol. Bydd dysgwyr yn gallu nodi datblygiad eu sgiliau a manteisio ar gynigion arbennig mewn siopau, caffis a sefydliadau trwy ddefnyddio Carden Wobrwyo Profi.
Cer draw i sianel YouTube Menter Gorllewin Sir Gâr os hoffet flas o’n gwaith neu cer i’n gwefan. Os oes unrhyw ymholiad yna cysyllta gyda'r tîm!
Cynllun Digidol
Mae yna ddwy elfen i weithgaredd MGSG Digidol, y cyntaf yw gweithredu cytundebau ar ran y Canolfannau Byd Gwaith i ddarparu sesiynau digidol i unigolion di-waith. Darperir y sesiynau yn ardaloedd Rhondda Cynon Taf, Pen-y-bont ar Ogwr, Maesteg, Porthcawl, Port Talbot, Castell Nedd, Abertawe, Sir Gâr, Ceredigion a Sir Benfro. Mae’r sesiynau yn cynnwys darparu sgiliau digidol sylfaenol, cefnogaeth chwilio ac ymgeisio am swyddi, creu a diweddaru CVs a chefnogaeth i ddefnyddio cyfrifon Credyd Cynhwysol.
Yr ail elfen a ddarperir gan MGSG Digidol yw Prosiect Digidol Sir Gâr sy’n cynnig cymorth digidol i unigolion ar ffurf sesiynau anffurfiol ar draws y Sir. Nod y cynllun yw cynnig cymorth digidol amrywiol megis, sut i ddefnyddio Cyfrifiadur, Gliniadur, Tablet/iPad, defnyddio'r We, Apiau a mynediad i wasanaethau ar-lein. Cyllidir y cynllun gan raglen Cymunedau Gwledig Llywodraeth Cymru - Rhaglen Datblygu Gwledig Cymru 2014-2020, a ariennir gan Lywodraeth Cymru a Chronfa Amaethyddol Ewrop ar gyfer Datblygu Gwledig.